O le fai ma motusia o le eletise o loo maua i le auaunaga a le faalapotopotoga o le malosi faaeletise o se faaletonu sa molimauina mai lena tausaga ua mavae ae o loo fai ma tula’i mai pea i le motu o Upolu i le amata savalia o lenei tausaga fou.
Ua fetaui lelei ai le taimi o le foa’i a le malo o Saina i afi eletise laiti e 50, ma le mana’omia o afi mōlī eletise faaleoleo e faaaogā pe a motusia faafuase’i le eletise e nisi o auaunaga tuma’oti i lo tatou atunuu.
O lea foa’i ua maua ai e le nofoaga o matua tausi i Mapuifagalele afi mōlī laiti e 10, o le faalapotopotoga o le Toomaga mo ē Puapuagatia e 4 afi ua foa’i iai.
O lea foi foa’i a le malo o Saina ua afea ai le iunivesite aoao a Samoa o se tasi lea o nofoaga e faamautū iai tagata i taimi o ni faalavelave faalenatura poo se evacuation center.
O le faalapotopotoga fesoasoani a le Ekalesia Aso Fitu o le Toe Afio Mai le ADRA ua tuuina atu foi nisi o afi mōlī eletise, faapea le koluse mūmū, ma le matāgaluega o puna’oa faalenatura ma si’osi’omaga sa tuusa’o iai le foa’i ona o le matāgaluega lea a le malo o loo iai le nofoaga tutotonu mo galuega lavea’i i taimi o faalavelave faalenatura.
O le minisita foi o le matāgaluega na saunoa faafetai i le sui o le malo o Saina i Samoa ona o le agalelei pea i le malo ma ana fuafuaga aemaise o le atina’e o le manuia o tagata.
Le Minisita o le Matāgaluega o Puna’oa Faalenatura ma Si’osi’omaga le tofa i le Igoamatua, Ale Vena Ale.
