I le mae’a ai o le aso e tasi na fono ai le Palemene i le Aso Lua o lenei vaiaso talu ona tolopo mai le masina o Aokuso, e lima komiti faapalemene ua talia e le Fono Aoao a latou lafo faatū sa toe talosagaina ai ni taimi faaopoopo, mo a latou iloiloga e tapena ai lipoti mo le tuuina atu i luma o le fono aoao faitulafono.

O le komiti o tulafono tumau o loo iloiloina teuteuga o le faavae ma le tulafono o fanua ma suafa 2024 faapea lipoti a le su’etusi sili ma lona ofisa, o le komiti o tupe maua ma tupe totogi e 3 lipoti e le’i mae’a tapena, o le komiti o vaega tau tamaoaiga e 4 lipoti e le’i mae’a foi ona tapena, faapea le komiti o vaega o atina’e eseese e lua lipoti faaletausaga e le’i mae’a ona iloiloina, ma le komiti su’esu’e faapitoa a le Palemene ua toe faaopoopo le taimi e faatino ai a latou sa’ili’iliga i tuua’iga a le sui Faipule o Safata Numera Muamua faasaga i le Minisita o Faatoaga ma Faigafaiva.

O taualumaga a le Palemene i le masina o Iuni na faatū ai le lafo na pasia sa poloa’ina ai lea sui mamalu le Afioga Leaana Ronie Posini e tuuina atu faamaoniga o ana tuua’iga, ma faapea ona tuuina atu ai i le komiti su’esu’e faapitoa a le Palemene, ma ua savalia nei le ono masina talu ona tuuina atu lea mataupu i le komiti su’esu’e faapitoa ae e le’i mae’a a latou sa’ili’iliga.

Ua tolopo galuega a le Palemene e toe tauaofia i le Aso Lua 21 o le masina o Ianuari o le tausaga fou 2025.