Ua mati’e le tulai mai o le Manu Samoa ina ua latou sapai nei le Ipu o le Siamupini i le taamilosaga o le lakapi iuni mo ‘au a le Pasefika, le Pacific Nation Cup 2022. O le aoauli ananafi, Aso Toonai i laufanua o Fiti, i le malae i Churchill Park i le aai o Lautoka, na faia ai lenei taaloga mo le su’eina o le Ipu autu i le va o le Manu Samoa ma le ‘au malosi a Fiti, le Vodafone Flying Fijians.
O ‘ai o lenei taaloga mata’ina e 23 le Manu Samoa i le 20 a le Vodafone Flying Fijians. E mata’ina le i’uga ua oo i ai lenei taamilosaga auā o se taimi muamua lenei talu ona amata mai lenei taamilosaga, ua laga ai le to’ilalo o le Manu Samoa i le ‘au lenei a le Flying Fijians.
E mae’a le ‘afa muamua o le taaloga, o loo sili ‘ai o Fiti i le 17 i le 3 a le Manu Samoa. Peitai na liliu le i’uga o le taaloga ina ua amata le ‘afa mulimuli ma maua ai isi ‘ai e 20 o le Manu Samoa ae faaopoopo na o le 3 ‘ai o le Flying Fijians i le ‘afa faai’u.
I lipoti mai le Fiji Broadcasting Corporation, ina ua faatalanoa le alii kapeteni o le Manu Samoa, susuga Michael Alaalatoa, na ia faaleo ai lona mitamitaga i lana ‘au ma le malosi maumaua’i sa faatino ai e tama uma le taaloga.
Saunoa Alaalatoa, latou te le’i o tamala i lenei taaloga, auā sa latou mautinoa o le ‘au lenei a Fiti o se ‘au malosi tele, ma na iloga mai lava lena malosi i le ‘afa muamua o le taaloga. Sa taumafai lava le latou ‘au e talitali atu le malosi tele o le una’i mai a Fiti aemaise lava i taimi o sikalamu. Peitai e lei foi ai lana ‘au; sa matuā finau lava tama ina ia mafai ona latou faafetauia le malosi lea o Fiti, o se vaega sa masani ona latou faia’ina ai i taaloga ua mavae, ae o le taimi la lenei, sa matuā nofo sauni i ai tama ina ia suia lena tulaga.
O le alii o Rodney Iona na ia a’aina le sala muamua mo le Manu Samoa i le uluai 13 minute o le taaloga, ma maua ai loa uluai ‘ai mo le Manu. Na tele foi ni taimi na iloga ai le lelei o le puipui atu o le Manu a o malolosi mai osofa’iga a Fiti i uluai minute o le taaloga.
Na toe osofai mai Fiti ma sikoa ai loa le latou numera 8 le alii o Albert Tuisue i se gaioiga faavavevave mai le 5 mita i le laina sikoa. Na ova le a’a a le alii o Ben Volavola ma faaopoopo ai o latou ‘ai e 7 i le 3 a le Manu.
Na toe faaopoopo isi ‘ai mo Fiti ina ua sikoa le latou ‘afa le alii o Frank Lomani ae pe ā ma le 30 minute talu ona amata le taaloga; na ova le a’a o le sikoa ma laa atu ai ‘ai o Fiti i le 14. Na toe sala le Manu ma ova ai le a’a a Volavola mo lena sala mo Fiti, ma tulai mai ai ‘ai o le taaloga i le ‘afa muamua, ua 17 Fiti i le na o ‘ai e 3 o le ulua’i sala mo le Manu.
Peitai o le toe taliu mai o le Manu i le ‘afa mulimuli na vaaia ai loa le malosi o le osofai a le ‘au seia oo ina sikoa le alii o Seilala Lam mo se ulua’i sikoa mo le Manu. Na ova le a’a a Rodney Iona ma tulai mai ‘ai o le Manu Samoa i le 10.
Na amata ona pa’ū atu ‘au uma e lua i mea sese ma feauaua’i ai lava ona faasala, oo atu ai ‘ai o Fiti i le 20, ae tulai mai Samoa i le 13. Na faasa’osa’o lelei le aao o le alii o Iona i le isi sala faaopoopo mo le ‘au talimalo seia oo ina ua suia i le isi sikoa a Lam ‘ai o le taaloga ma sili ai loa Samoa i ‘ai e 21.
Na ova le a’a o le sikoa na kiki e le fly-half ma sili ai loa le Manu Samoa i ‘ai e 3, ma e lei mafai ona toe suia e se osofa’iga a Fiti le malosi o le talipuipui atu a le Manu, seia oo ai lava ina faauma le taaloga ua tumau pea ‘ai i le 23 mo le Manu Samoa, ae 20 mo le Vodafone Flying Fijians.
I se faatalanoaga a le FBC ma le kapeteni o le ‘au a Fiti le alii o Waisea Nayacalevu, na ia ta’utino ai, sa tatau ona lelei atu se faatinoga o le latou taaloga, peitai ane, e lē o lea le tulaga na taunuu i ai.
Saunoa le alii kapeteni, o mea sese uma na latou faia i lenei taaloga, o le a toe faufau ai le latou ‘au mo le lumanai. Na latou iloa lava ma sauni i le malosi o le a iai se latou fetauiga ma le Manu, ae foliga mai ua fai si o latou faatamala.
Sa iai lava le faanaunauga o le ‘au a Fiti o le a faaauau pea le latou masani o le faato’ilalo o Samoa i le taamilosaga lenei o le Ipu a le Pasefika (PNC) e pei ona iai isi uma tausaga ua mavae ae ua suia nei lea masaniga ina ua toe foi le Manu i lona malosi sa masani ona iloga ai i lenei fa’agatama o le lakapi.
O i’uga nei sa masani ona iai taaloga a Fiti ma Samoa i lenei taamilosaga i tausaga ua tuanai: 2016 (26-16), 2017 (38-16), 2018 (24-22), 2019 (10-3).
Mo le faatulagana o ‘au i le Pacific Nation Cup 2022: Samoa – 14, Ausetalia – 12, Fiti – 6, Tonga – 0.
