E silia ma le $2000 le tau o apa pisupo gaoi ua molia ai nei le tamā Aukilani.
A o iai i tua leoleo i leoleoga i le afiafi o le Aso Gafua o le vaiaso nei, na vaaia ai lē ua molia o loo finau ma sui o le aufaigaluega a le Woolworths i Takanini, ma o i lea na maua ai a o taumafai e alu ese.
O loo tuua’ia e tusa ma le 20 isi apa pisupo ma isi oloa na taumafai e alu ma ia e aunoa ma le totogiina.
I lipoti a leoleo, o le maua ai o lē ua molia i le vaiaso nei ua iloa ai foi o ia lava lea e toatasi o loo saili e fesootai ma nisi lava o gaoi i Takanini, Manukau faapea Meadowlands.
E tusa ma le faavalu ona gaoi e lē ua molia lenei oloa, ma na amata mai i le masina o Novema o le tausaga talu ai lea ua oo atu le tau i le silia ma le $2000.
E 39 tausaga le matua o lē ua molia, ma o loo tālia le aso e tulai ai i luma o le Faamasinoga Faaitumalo i Papakura.
Puna o Faamatalaga: Police arrest Auckland man who stole $2000 worth of canned corned beef – NZ Herald
