E loo tau sailia pea e le Matagaluega o le Soifua Maloloina le mafuaaga tonu poo fea na aafia mai ai le tagata muamua lava i le komunitī a Samoa i auga o le faama’i Koviti19.
Na faailoa e le Sui Faatonu Sili o le Matagaluega Tagaloa Dr. Robert Thompson ua auina atu i Niu Sila nisi o samples mo le saga iloilo ma toe fai ai nisi suesuega ma le tatalo ina ia maua mai ai se faamalamalama o le mafuaaga tonu na aafia ai le tagata muamua lea i tua i le lautele o le atunuu.
Taua e Tagaloa o loo taumafai e toe iloilo pe trace i tua fesootaiga a le tagata muamua lea na aafia i le vairusi peitai e le’i mafai ona maua le mafuaaga tonu. E ui na tele fesili a tusitala e tuliloa ai lea tulaga ae na tali Tagaloa e le’o se fesili faigofie e mafai ona tali i le taimi nei ae o loo faaauau pea sailiiliga.
O loo iai le talitonuga o nisi o fomai a le atunuu (local doctors) ua leva ona i tua i tagata lautele le faama’i ae le’i maua le tagata muamua mai le komiunitī i le vaiaso na te’a nei.
