Ua lē manuia taumafaiga a la tatou ‘au, le Manu Samoa Taitoafitu ina ua malolo ai i le Olopeleki a Niu Sila i le sailiga o le tulaga iva ma le sefulu, i le taamilosaga i Perth i Ausetalia.

O Samoa sa pulu faatasi ma Fiti, Farani ma Niu Sila ma e lei manumalo la tatou ‘au i ‘au uma nei.

Na sao atu Fiti ma Farani i le sailiga o le ipu autu peitai, o Samoa na taaalo ma Peretania e saili ai se ‘au e taaalo ma Niu Sila mo le tulaga iva ma le sefulu ma na manumalo ia Peretania ae e lei manuia le taumafaiga i le la taaloga ma Niu Sila mo le tulaga iva.

Na faaalia e le faiaoga ulu o le Manu Samoa Taitoafitu le Afioga Muliagatele Anae Fata Brian Lima ina ua fesootai atu iai a tatou tala ma ia ta’ua ai o loo sologa manuia mea uma.

Na pau le tama taalo o loo faamanu’alia o le susuga ia Malakesi i lona auvae se’i tulou ma o loo faia lona faata. 

Saunoa Muliagatele e tele avanoa sa maua e mafai ona tatou malo ai i taaloga i le pulu peitai o faaiuga fai ma le faatinoga o fuafuaga poo le plan na faaletonu ai ma lē maua ai avanoa sa tatau ona malo ai.

O loo faafiafiaina le alii faiaoga ulu i tama taaalo ma la latou faatinoga e pei ona sa tuu iai lo latou loto atoa, ae o loo iai lava foi avanoa mo mea e faaleleia pe a foi mai i fanua.

O le vae o le a sosoo ai o Vancouver ma LA, ma o taeao lea e fuafua e foi mai ai le Manu Samoa Taitoafitu.