Ua lē fiafia le minisita o le Defence Force a Niu Sila, Judith Collins i le leai o se tala a Saina i ana vaa tetele e tolu a le militeli o loo iai nei i le Tasman Sea, poo ogasami o loo tuaoi ai Niu Sila ma Ausetalia.
Na ta’ua e le minisita o lea ua faaaoga e Saina lana aia tatau i lalo o maliega a malo aufaatasia lea e mafai ai ona fealuai i ogasami nei.
O se uluai taimi ua aumai ai vaa tau nei a Saina i le itulagi i saute, ma i ripoti a le ABC i le vaiaso talu ai o lea ua agai mai i sasae o Sini i Ausetalia.
Fai mai Collins ona o lea e le’i fai mai Saina poo lana amepasa foi i le mafua’aga o le omai o ana vaa nei, toe lē iloa ana fuafuaga o iai i le aga’i i luma, o lea o loo faaauau ai pea ona mata’itū e Niu Sila faapea Ausetalia.
O le omai ai o vaa nei i ogasami tuaoi o Niu Sila ma Ausetalia e aunoa ma se tala na mua’i faailoa mai e Saina o se faiga e ui e lē solitulafono, peitai e tatau pea ona mata’itū.
Ae i nisi o tagata su’esu’e e talitonu, ua o se gaioiga e faailo mai ai le malosi’aga o loo umia e Saina.
E lē o iloa e le minisita ia Collins poo vaa nei e iai ni malosi’aga faaniukilia, pau o lea e mata’utia malosi’aga.
Puna o Faamatalaga: https://www.1news.co.nz/2025/02/20/nzdf-says-no-notice-given-of-chinese-navy-ships-in-tasman-sea/
