E ioeina e le alii taalo o Kayleb Minirapa Milne 25 tausaga ona moliaga i le Faamasinoga Faaitumalo i Brisbane i le vaiaso nei, moliaga e faatatau i le faaoolima ua afua ai ona faamanu’alia se tagata.
O Milne sa taalo mo kalapu liki a Melepone ma Cronulla i le 2018 ma le 2019.
O le faamatalaga a le faamasino na feagai ma le mataupu Zachary Kaplan pei ona lipotia i le herald ua taua ai lana faamatalaga o Milne o se tagata umi toe malosi sa ia faaoolima i se tamaitai e matuai itiiti ane lona tino i le 2023 ma e lē faatasi foi ona faia lea tulaga ma faailoa foi ata o aafiaga o lea tamaitai i le faamasinoga.
Faailoa foi e le faamasino e lē lava molimau e faailoa ai e iai se sootaga o nisi aafiaga sa feta’ua’ina o le alii taalo, e pei o ni aafiaga i le fai’ai tulou, aga’i i lana soligatulafono.
E fā tausaga le faasalaga faafalepuipui peitai ua mae’a ona tuli le 155 aso sa taofia ai ma ua tuuina iai le tolu tausaga e nofo vaavaaia ai.
Ona o ia o se sitiseni Niu Sila o lona uiga foi la ua agavaa e toe tipoti ese ma Ausetalia ona o moliaga ua faamaonia atoa ma lona faasalaga.
Puna o Faamatalaga: https://www.nzherald.co.nz/sport/kiwi-rugby-league-player-kayleb-minirapa-milnes-assault-not-linked-to-brain-injury-judge/GJJISGWPNNGA3MM6TJL53IJTFU/
