O le talanoaina o le lipoti a le komiti faapalemene mo nisi auaunaga a le Malo e pei o tagata tafafao mai fafo, na saunoa ai le taitai o le Itu Agai i le ta’ua o se tasi o fuafuaga a le Malo a o avea o ia ma Palemia, o le 20 eka o eleele e faato’a ma totō ai soo se laau manogi ma laau e  matagofie o latou fua, e ave iai tagata tafafao e maimoa ma latou sosogiina le manogi o a tatou laau e pei o le ‘oli, ma le asi.

Na lautele atu ai le finagalo o le taitai o le Itu Agai ma ia ta’ua se fono a faipule o le Senate a le faigamalo a Amerika Samoa sa faafofoga iai, ma talanoaina ai se fuafuaga o se fanua e 400 eka i Samoa mo se atinae auā fuafuaga a Amerika Samoa.

Na finauina ai e Tuilaepa le Malo e faailoa atu poo le ā lea atinae ma le 400 eka, ina ia malamalama le atunuu aemaise le itumalo o Falealili.

“Fai la ma faata’ita’iga le mataupu lea e fesili mai ai le taitai o le Itu Agai i le 400 eka, ia o la e saunoa mai le taitaifono e lē o iai i totonu o le lipoti, ae se’i o’u tali puupuu atu ia, ou te leiloa foi e a’u ia lena mea”…Palemia.

Na manino i le faamalamalamaga a le tamaitai Palemia o le talanoaina o lipoti a komiti faapalemene e sosolo i luga o faiga faavae a le Malo, ma e agai sa’o foi finagalo faaalia o sui mamalu i lipoti ma vaega o loo lāgā ai.

Peitai na faaalia e le taitai o le Malo o le afea ai o nisi mataupu e lē o i totonu o lipoti, e lē afaina lea ae e ao ona manino sui faipule o faiga faavae a le Malo e lima taitaiina ai felafolafoaiga aemaise o tulafono tumau.

Na faailoa e le afioga Fiame Naomi Mata’afa ina ua toe tulai, masalo o se fake news na maua ai e le taitai o le Itu Agai le mataupu i le 400 eka, ae na tulai Tuilaepa ma ia toe tali atu, o le fono a le Senate a Amerika Samoa sa ia faafofoga iai o loo talanoaina ai le 400 eka, ae lē o se fake news.

O le vaiaso ua mavae sa lipotia ai se fuafuaga e faapea na faataoto i le fono mulimuli o le Atoa o Samoa na usuia i Apia, ua fuafua ai se atinae lafumanu mo Amerika Samoa e faaaogā iai le 400 eka i Togitogiga.

Sa faailoa ai ni atugaluga o nisi o sui o le Senate ona e lei manino i latou i aiaiga o lea fuafuaga ma le latou finauga e tatau ona mautu se sainigalima i le va o faigamalo e lua, Samoa Tutoatasi ma Amerika Samoa e manino ai lea fuafuaga.