Ua faamaonia mai i le ripoti lata mai a le Matagaluega o le Soifua Maloloina mai le 2:00pm o le Aso 10 o Me i le 2:00pm o le Aso 12 o Me o le masina nei lava le faatumauina o i latou ua maliliu i le Koviti i le to’a 24.
E to’a 358 i latou fou ua pesia i le siama o le Koviti-19 ma e to’aono i latou o loo faanofoesea i nofoaga faapitoa i le Maota Gasegase i Motootua.
Ua oo atu ai nei le aofaiga o i latou ua pesia i le faama’i i le atunuu i le to’a 11,671. O le to’a 11,595 o i latou mai le Komuniti talu ona pesia i tua le faama’i i le aso 17 o Mati faaopoopo ai ma le to’a 76 o le aofa’iga o i latou na malaga mai fafo i totonu o Samoa sa pesia i le Koviti-19 talu mai Novema o le tausaga 2020 lea e maua atoa ai lea fuainumera.
O loo fautuaina pea e le Matagaluega le mamalu lautele ina ia tausisia ma fa’amalosia fautuaga masani ua folasia mai e le Soifua Mālōlōina e aofia ai le faia o tali fofoga, tausisi i le lua mita mai le isi tagata aemaise i nofoaga faitele, nofo lelei i le fale ma fa’anofoesea i se nofoaga fa’apitoa o lou maota pe afai ua masalo lou a’afia i āuga o le fa’ama’i.
E le gata i lea ua talosagaina fo’i le mamalu o le atunu’u ina ia agai e faia tui puipui auā o le puipuiga sili lea mo tagata uma, e tete’e atu ai i le sosolo fa’aafi o le Koviti – 19.
