O se alii ua 28 tausaga lona matua sa ioe i luma o le Faamasinoga Maualuga i le moliaga o le ave taavale faatamala na mafua ai ona maliu se tamaititi 17 tausaga le matua, ua faasala i le falepuipui mo le umi e 6 masina.
Sa ioe foi lē ua faasalaina i le moliaga o le ave o le taavale ae leai sona laisene ma ua faamaonia lea moliaga ae leai se faasalaga. O le masina o Me o le tausaga na tea nei i se vaega o le alatele i le nuu o Lano i Savaii sa tulai mai ai lea faalavelave tau taavale, ina ua lavea lē ua maliu ao ia taumafai e sopoia le isi itu o le alatele.
O le pasi sa tu i autafa o le auala sa malaga ai lē ua maliu, lea sa oso i le pito i tua o le pasi ma taumafai e kolosi le auala ae aafia ai i le taavale. O faamaumauga a leoleo e saoasaoa tele le taavale a lē ua nofosala lea sa malaga i le saoasaoa e tusa ma le 60 kilomita.
O le saoasaoa sa ia lē mafai ai ona taofiofi le taavale ao sopoia e lē ua maliu le aualatele ma tupu ai loa le faalavelave, lea na fano ai le ola o le tamaititi 17 tausaga e lei oo i le falemai i Tuasivi.
E tele itu lelei na faavae ai le faaiuga a le faamasinoga e pei o le amio lelei o le ua nofosala, ua salamo moni mai le solitulafono, ma sa faia e lona aiga se ifoga i le aiga o lē ua maliu ma ave palapala a malo ma le tupe e sefulu afe tala.
O le faasalaga o loo aiaia faaletulafono mo le moliaga o le ave taavale faatamala e maliu ai se tagata pe a faamaonia, o le 10 tausaga i le falepuipui poo le faasalaga tupe e 25 afe tala.
O le faasalaga maualuga o le moliaga o le ave taavale ae leai se laisene pe a faamaonia e 200 tala le sala tupe.
O le faasalaga ono masina i le falepuipui o Mamona Taliuo Samoala o Patamea, ua toese ai le taimi sa nofo taofia ai ao faia suesuega a leoleo.
