E leai se foa’i tupe na faia e le Ekalesia Aso Fitu Samoa Tuto’atasi poo le SISDAC mo le vaega faaupufai e puipuia aiātatau a tagata.

O le finagalo lea o le ta’ita’i o lea pati faaupufai le susuga Tuilaepa L Sailele Malielegaoi, i le feiloa’iga ma tusitala i le vaiaso nei, e mafua ona o se foa’i a le Ekalesia Aso Fitu Samoa Tuto’atasi na tauaao ai le 200 afe tala a lea ekalesia mo le vaega faaupufai o le Faatuatua i le Atua Samoa ua Tasi.

Ua faaalia ai e se sui o le ekalesia i le faia o lea foa’i, e iai foi isi pati faaupufai i Samoa sa ave iai a latou foa’i.

O le lipoti a le vaega faasalalau o le Talamua o loo faailoa ai e le susuga i le faifeau o Pastor Alaimoana Willie Papu, sa latou faia foi ni foa’i mo le vaega faaupufai e puipuia aiātatau a tagata.

Le ta’ita’i o le Itu Agai ma le vaega faaupufai e puipuia aiātatau a tagata susuga, Tuilaepa L Sailele Malielegaoi.