O le faamai ua pepesi nei i Samoa le fiva ponaivi poo le dengue fever e leai sona tuipuipui, ae e mafai ona maua le fofo i le galulue o tagata uma e faatino auala o puipuiga ina ia faamamā nofoaga e nonofo ma tuufua ai iniseti o le namu, e feaveaiina le vairusi o le fiva o ponaivi.
O le amataga o le vaiaso nei ua faia ai aoaoga a le aufaigaluega e toa 20 o le matagaluega o le soifua maloloina, mo le faaaogāina o se ituaiga o vailaau fou e fana ai nofoaga o loo nonofo ai namu, ina ia faaitiitia ai le pepesi o lea faamai, e pei ona faailoa e le Faatonu Sili o le soifua maloloina e 216 tagata i le atunuu ua maua ai.
O lea aofaiga o gasegase e mai faamaumauga o le masina o Novema o le tausaga na tea nei seia oo mai i le aso 14 o le masina nei o Aperila.
O le lua vaiaso muamua lava ia o le masina nei e 81 tagata na faamaonia ai ua maua i le fiva ponaivi.
Le Faatonu sili aoao o le soifua maloloina susuga Aiono Dr Alec Ekeroma.
O le fanaina o nofoaga o loo tuufua ma nonofo ai iniseti o le namu, ua o se galuega e faatino e le soifua maloloina mo nofoaga o loo toatele tagata ua aafia i le fiva o ponaivi, ae o le talosaga a le faatonu sili o le soifua maloloina, ia lagolago atu komiti o fono faavae a itumalo palota e 51 i le faia o le galuega o le faamama o le fanua i nofoaga o loo tele ai lapisi e pei atigi apa ma pa’u taavale ma otaota e toa ai le suavai e fiafia tele namu e nonofo ma fanafanau ai.
Ua saili nei e lea matagaluega se vaegatupe e tusa ma le 300 afe tala e faatau ai vailaau e fana ai ia mamate namu.
Ua fautuaina ai le atunuu e faaaogā ta’inamu, faaaogā foi faaasu namu faapea fagu spray namu le mosquito repellant, e puipuia ai mai le aafia i se ū a le namu o fealuai ma le vairusi o le dengue fever poo le fiva o ponaivi.
E iai tagata o le atunuu na maliliu i lea gasegase sa pesia ai foi Samoa i le tausaga e 2017, peitai e lei maua se faamaumauga a le matagaluega ina ua fesiligia le Faatonu Sili aoao o le soifua maloloina i le fono ma tusitala ma le aufaasalalau i le Aso Faraile na tea nei.
Mo tagata e malaga mai i le atunuu e leai se tulaga e faapopoleina ai i le pepesi o le fiva o ponaivi, ae ua fautuaina e susū mai ma tapenapena i puipuiga e pei o le aumai o se fagu spray namu, ma faaeteete le agai i nofoaga pogisa e fiafia tele namu e o iai.
