Tusia – Galumalemana Tipi Autagavaia  
 
O le komisi suesue o faigapalota o le a toe iloiloina ma toe autalu le tulafono o faigapalota ma le faaiuga ole palota tele na faia ia Aperila o le tausaga na te’a nei, ose taimi muamua lenei ua lē toe filifilia iai nisi o tamalii ma failauga sa seei i tofi faipule ma nisi sa avea ma sui tauva.  
 
O lea ua faailoa e le Minisita o le ofisa o le komisi o faigapalota le afioga Faualo Harry Jeffrey Schuster ise lipoti a le Samoa Observer, ua faaiugafonoina e le kapeneta ile vaiaso nei le filifilia o sui o lea komisi su’esu’e ua taitaifono ai le tofa Tu’uu Dr Ieti Taule’alo sa avea ma taitaifono o le Komisi e pulea tagata faigaluega a le Malo.  
 
O sui o le komisi o le afioga Fe’esago George Fepulea’i, ose tasi foi o tamalii sa avea ma taitaifono o le komisi e pulea tagata faigaluega a le Malo faapea se tasi o tamaitai ma tina o le atunuu sa seei foi i lea tofiga ini tausaga ua mavae le afioga Faamausili Dr Matagialofi Lua’iufi. 
 
 O isi sui o le faletua le afioga Tuimanu’a Dr Emma Vaai ose tasi o ofisa sinia o le pulega o le Iunivesite aoao a Samoa, le faletua malolo manumalo Erolini Vaiao Eteuati, ose tasi o tamaitai o le atunuu sa avea ma ofisa sili o le faalapotopotoga o Eleele o Samoa le afioga Peseta Arasi Tiotio, ole susuga ile faifeau toeaina EFKS ua malolo manumalo susuga Tavita Roma, se tasi o tamalii sa avea ma faamasino sinia o le faamasinoga o fanua ma suafa le tofa Vaaelua Rimoni Vaaelua, ose tamalii sa galue foi ile Malo ini tausaga ua mavae ose faipisinisi le afioga Tupuola Koki Tuala, mase tasi o loia sinia e iai ona tomai i mataupu tau tulafono faavae le afioga Leuluaialii Tasi Malifa.   
 
O le komisi suesue o faigapalota latou te tuuina atu ile Palemene se lipoti ua iai ma fautuaga ini fuafuaga e faaleleia atili ai le faatinoina o faigapalota a le atunuu aemaise o fautuaga e teuteu atili ai le Tulafono o Faigapalota.