Ua alu lenei vaiaso o faaletonu uiga o le tau i Samoa i matagi ma savili malolosi e to faata’uta’u aemaise o timuga mamafa, ua tatafe ai vaitafe ma aafia ai nisi o vaega maualalo o le atunuu i lōlōga.
O nisi vaega o alatetele ua palalasi iai laau ma aafia i solo eleele.
Ua faailoa e le ofisa o le vaaitau i lana lipoti lona 17 o uiga loulouā o le tau i le afiafi ananafi o uiga susū o le tau ma savili malolosi o loo aafia ai pea le atunuu, e afua mai i fetaia’iga faatupula’ia o savili ma timuga o le Pasefika i Saute o loo taoto pea i luga o Samoa.
O ia uiga faaletonu o le tau na tapunia ai a’oga uma i le atunuu i le Aso Tofi ma ua faaauau i le Aso Faraile le faai’uga o lenei vaiaso.
Ua fautuaina ai e le Ofisa Sili o le Matagaluega o A’oga ma Aganuu, faauluuluga o a’oga uma a ekalesia ma a’oga tuma’oti ina ia logosa’ia le fautuaga e taofi uma fanau i aiga e leai ni a’oga mo lo latou saogalemu.
O le afiafi o le Aso Tofi na aumai ai se saunoaga a le Minisita o Galuega Tetele ma Fela’ua’iga e tusa o faaletonu i auaunaga a vaa o le malo, faapea le motusia o le eletise ma le suavai e mafua i uiga faaletonu o le tau.
