Ua su’esu’e nei e leoleo se tamaitai, ua tuua’ia i lona faaaogāina o le oo atu i le $158,000 na faamauina le sesē ona tuu atu i totonu o lana teuga tupe i le faletupe.
O lē e ona le seleni o le tamā penisione ia Andrew Che Sit Bong, o se tamā na taumafai e lafo lana seleni mai le faletupe i Peretania aga’i i lana teugatupe i se faletupe i Niu Sila, peita’i e le’i oo lea seleni i le account ae alu sa’o i le teugatupe a lē o loo tuua’ia.
Ta’ua i le lipoti e le NZ Herald, na mafai e le Westpac ona toe maua mai le $28,000 a lenei tamā, peita’i o le tele o le tupe na faaalu uma e le tamaitai e faatau ai ni taavale, ma lafo nisi o lenei vaegtupe o nisi o tagata na te silafia.
Ua faamauina i lipoti, ina ua talosagaina lea tamaitai e toe faafoi atu le seleni, na musu, ma e le’i mana’o e toe faafoi, ma ua faasolo ai nei su’esu’ega a leoleo.
I le faaaogāina o lenei seleni, na lipotia e 2 taavale na faatauina e le tamaitai, $60,000 na lafo ma lana uo tama faapouliuli ma le $20,000 sa ia lafo i se tasi o ona tauaiga i Samoa.
O Andrew Che Sit Bong, o se tamā penisione, sa galue o se inisinia tau eletise (electrical engineer) mo le tele o tausaga ma ua 78 nei ona tausaga.
E lē o mafai ona faailoa le suafa o lē o loo tuua’ia, ae faamauina o lea tinā e to’alima lana fanau.
Puna o Faamatalaga: https://www.nzherald.co.nz/nz/auckland-pensioner-loses-158000-after-accidentally-sending-life-savings-to-wrong-account
