O loo tuu fesili pea tagata i Ueligitone pe lē tatau ona totogi mai e le Wellington Electricity aiga uma ua matuā faatama’ia ma faaleagaina o latou maota ma meatotino e matagi malolosi afatia ai le aai, aemaise le tele o vaiaso o loo motusia pea le eletise i nei aiga.
Na iai nisi aiga na mafai ona toe faaola e le kamupani eletise a latou paoa i le afiafi o le Aso Gafua; o aiga e le’i ogaoga tele ni mea na faaleagaina i o latou fale, peita’i o loo motusia pea le eletise i le tele o isi fale ma atonu o se aso mulimuli ane o le a toe maua ai e nei aiga le eletise.
Faailoa lagona mafatia o nai isi aiga, ona o le faaleagaina o pusa’aisa ma leaga uma ai mea’ai sa teu ai; ma e silia ma le faitau selau ni seleni ua ma’umau ai.
E tusa ma le 700 fale o aiga na afatia ma motusia ai le eletise, ma o loo faatalitali pea la tagata o le itumalo pe iai se fuafuaga faapea a le kamupani eletise ina ia toe maua se fesoasoani mo le tele o aiga ua afaina a latou meatotino mai lenei mala faalenatura.
