O le a lē oo ona faia le taaloga a le Moana Pasifika ma le ‘au a le Chiefs mo le taamilosaga o loo faagasolo nei a le Super Rugby Pacific, lea na faatulaga e faia i Nukualofa i Tonga.
I se faamatalaga a le ofisa sili o le kalapu i le Aso Gafua e pei ona faasalalau i le Radio Niu Sila, Debbie Sorensen, na ia ta’ua ai, e ui sa latou taumafai malosi ia faataunuu lena taaloga, i le Teufaiva Stadium i Nukualofa, ae ua lē mafai ona oo lea fuafuaga ona o le lē lava o le seleni e faatupe ai ma lē lava sponsors.
Ta’ua e Sorensen, na sa’ili’ili le kalapu i avanoa uma e mafai ai ona faatino lea taaloga i Tonga, ae e le’i mafai ona latou maua ni sponsors e lava mo le faatupeina o lea taaloga.
O le lu’itau lea o loo fesaga’i ma le kalapu, e lē o iai se matou vaega tupe e faatupe ai le aumaia o a matou taaloga e fai i le itulagi o le Pasefika, ae matou te iloa o se mea e tatau ona fai.
E ui ina matou lagona le faanoanoa i si a matou ‘au, e faapena ia matou fans, aemaise aiga o nai tama taaalo i Tonga, ae o loo matou taumafai pea e ua’i atoa atu ma una’i pea le taaloga i totonu o le Pasefika.
Na ta’ua e le CEO o le Iuni Lakapi a Tonga, Aisea Aholelei, e faanoanoa ona ua lē mafai e le Moana Pasifika ona fai lana taaloga i Tonga i lenei tausaga.
Fai mai Aholelei, e tai pei lava le faafitauli lea e tupu i le Moana Pasifika o faafitauli foi o loo fesaga’i ma le Iuni Lakapi a Tonga, soo se taimi matou te manana’o ai e fai atu se taaloga i Tonga, e tele lava tupe e gau ai se’i vaganā ua matou maua se sponsor tele e fesoasoani mai.
Puna o Faamatalaga: https://www.rnz.co.nz/international/pacific-news/587669/moana-pasifika-can-t-afford-to-play-in-tonga-look-for-alternative-venue-for-chiefs-match
