Fai mai le alii faiaoga o Mal Meninga o le a ia lē finauina tama taaalo agavaa a le NRL poo le lakapi liki ina ia faamalosia le tuuina o le latou tautoga i le taaloga mo Ausetalia a’o lumanai ai le Ipu o le lalolagi i le taaloga lakapi liki.

O suiga i le taaloga i nai taimi ua tuanai atu e mafua i mafuaaga e aofia ai le agai i luga o isi ‘au e pei foi o Tonga lea na fesoasoani tele iai le mafai ona suia o ‘au e taaalo ai nisi o tama taaalo mai Niu Sila faapea ma Ausetalia.

Ta’ua i le lipoti a le 7News o le agai ane o alii taaalo e pei o Junior Paulo, Jarome Luai, Brian Too, Tino Faasuamaleaui ma isi tama taaalo mai Fiti, Papua Niu Kini ma Tonga ua masani ai le silasila a le toatele i taaloga o le liki i vaiaso taitasi ma e feagai i latou ia ma faaiuga e faia i o latou agavaa faavaomalo e mafai ona taaalo ai mo o latou atunuu.

Fai mai la Meninga o le a ia lē faamalosia le tulaga e pei ona sa masani ai mo tama taaalo ma e lē o lana auala lea e faatino ai le taaloga. O Iulai ua fuafua e faailoa ai e le faiaoga lana ‘au mo le Kangaroos.