O se manuaga i lona tulivae lea ua ta’ua mai ua le mafai ai ona faaauauina e Taylan May le taamilosaga o le 2023.
O le ‘afa muamua o le taaloga a le Panthers ma St Helens i le faaiuga o le vaiaso na afaina ai le alii taalo ma ua faamaonia i siaki na faia o le a manaomia ona faia se taotoga.
E 21 tausaga o May ma o ia le isi tagata taalo lelei a le Panthers lea na manumalo i le taamilosaga talu ai ma e 16 ana sikoa tuuaofai i le 22 o taimi na taalo ai.
Ua ta’ua i lipoti o Charlie Staines sa ono suitulaga ia May peitai ua auai atu nei o ia i le West Tigers.
O Brian Too o loo iai pea i le uigi agavale a Penrith a o Sunia Turuva lea e foliga o le a suitulaga ia May.
O le taaloga muamua a Penrith e fetaui ai ma Broncos i le Aso Faraile 3 o Mati.
