O le nuu o Samalaeulu i Savaii ua lipotia mai ai e leoleo se faalavelave na maliu ai se tama tane ina ua lavea le ao poo le ulu i se maa.
O se isi tama tane mai lea lava afioaga ua nofo taofia nei i le vaaiga a leoleo mo suesuega ona o loo tuua’ia i lona togi o le ulu o lē ua maliu, ma ua faailoa e le Komesina o leoleo i se lipoti o se feeseesea’iga na mafua ai le gaioiga ua molia ai lē ua taofia i le solitulafono o le fasioti tagata faamoemoeina.
O le Aso Tofi ua mavae na tulai mai ai le gaioiga na togi ai le ulu o lē ua maliu, ae o le Aso Toonai na te’a nei na maliu ai lē na aafia i le maota gasegase i Motootua lea na aumai iai mai le falemai i Tuasivi mo togafitiga.
O le Aso Gafua 29 o Iulai e tulai ai i le Faamasinoga Maualuga i Mulinuu lē ua molia i lea mataupu tau solitulafono.
