E na o le 16 tausaga o se tama talavou ua molia foi e leoleo ina ua oso le taavale sa ia aveina i luga o le footpath ma lavea ai se tagata na savali ane i le itu i Matu i Sisifo o Melepone.
O le talavou e iai lona laisene avetaavale faaa’oa’o, (learner licence) ae lipotia e na o ia na alu ane i le taavale i le taimi na tupu ai le faalavelave lea i le afiafi o le Aso Lua o le vaiaso nei.
Na agai sa’o le taavale i se alii e 29 tausaga le matua na savali ane i le auala lea o Taylors Road i Kellor Downs ma na maliu ai lava i lea taimi.
E fai foi si tigaina o manu’aga o le talavou ma sa aveina atu i le falema’i mo togafitiga ae i le mae’a o suesuega ma faatalanoaga ma leoleo ua molia ai nei i le avetaavale matautia ua mafua ai le maliu ma le alu i le taavale na o ia ae o loo i le learner licence.
O le asō o loo tulai ai i le faamasinoga o tamaiti.
