Ua lavea fua foaga e lei fai misa, atonu o se faamatalaga lea ua talafeagai foi i se tasi o tamā mai Niu Sa Uelese nei o loo taofia i le falema’i i se tulaga tigaina ina ua osofa’ia a o aga’i atu e fesoasoani i se faalavelave na tupu i fafo ane o lo latou fale.
Ua ta’ua i lipoti i le asō mai le Alaata7 a Ausetalia, o si tamā lea o Rob Sedddon, 63 tausaga o le soifua, o ia le isi o tuaoi poo aiga e aumau i le Hamlyn Terrace i Central Coast, na tamomo’e ane i fafo ina ua faalogoina le lavea o se taavale i lo latou auala i le po o le Aso Toonai na te’a nei.
Fai mai lipoti o se taavale ua aga’i sa’o lava i se caravan sa paka i le alatele ma o le avetaavale o se tamaitiiti 17 tausaga lea na aga’i atu si tamā e pei ona ta’ua ma nisi o ona tuaoi e ofoina iai le fesoasoani ae osofa’i ai e se kulupu o tama talavou e pei ona faailoa e leoleo.
Na matapogia si tamā lea ona o lea osofa’iga ma afaina ai lona ulu ma auina atu ai loa i le falema’i mo togafitiga ma o loo iai pea i le potu tigaina. Sa osofa’ia foi ma si ona atalii 21 tausaga ma isi o o latou tuaoi na agai ane e fesosoani.
Fai mai le to’alua o si tamā ua aafia, e lē malamalama pe aisea ua osofa’i ai fua ae na o atu e fesoasoani ma e leai ma se gaioiga a si ona to’alua na faia e faatupu ai se vevesi.
O lona to’alua ua mae’a a’oa’oina i le ofoina o le fesoasoani muamua o le ala lea na aga’i atu ai e fesoasoani i lē sa aveina le taavale.
Ua faamaonia sa tagofia e le 17 tausaga lea sa avetaavale le ‘ava malosi ma ua molia i le avetaavale faatamala ae leai lava se isi tagata ua molia i le osofa’ia o le tama ua aafia ma lona atalii ma o loo faaauau pea su’esu’ega.
