Ua lava molimau e faamuta ai le toe faafaigaluegaina o le ofisa sinia o le vaega o galuega faavaitaimi, i le Matagaluega o Alamanuia, Pisinisi ma Leipa sa tuuaia i lona faia o faatonuga, e faaauau ona tapena se tasi o aumalaga mo galuega faavaitaimi, a o taofia lē tumau le toe tuua o Samoa mo ia galuega i le masina o Ianuari ona o se faaiuga a le Kapeneta.

Ua faailoa i se finagalo o le afioga i le tamaitai Palemia, le afioga Fiame Naomi Mataafa, o le tulaga lava ia i le mataupu lenei e pei ona iai se lipoti o se suesuega faalotoifale ua tauaao e le Kapeneta, o le iloiloina o se faaiuga mo nisi o tagata faigaluega sa usitai i le faatonuga a le ofisa sinia, o le komisi o galuega a le Malo e fitoitonu ma se faaiuga mo latou ia, ae o le lipoti ua oo atu ua faia ai le faaiuga e toe faaauau le taimi galue o le tagata faigaluega o loo avea nei ma sooupu mo galuega faavaitaimi i Niu Sila mo se ono masina ae sei mataitu le faatinoga o ona tiute fai.

O le tasi lea o tagata faigaluega o loo iai le tuuaiga sa ia silafia lelei le faaiuga e taofia le tumau le toe aveina i fafo o tagata faigaluega faavaitaimi mo le masina amata o le tausaga nei, a o tālia le iloiloga a le komiti faapitoa a le Kapeneta, ae sa ia lagolago i le tapenaina o le aumalaga na tuua Samoa mo ia galuega i le masina o Ianuari.