I le savalia ai nei o le lima masina talu ona mae’a le palota tele faanatinati a le atunuu ia Aokuso o le tausaga ua mavae, o le filifiliga a le itumalo faapalota o Vaisigano 2 na tusi aao ai i le sui tauva tuto’atasi le afioga Motuopuaa Seve Henney Afereti Papalii.
O le mae’a ona faatauto o sui filifilia o itumalo faapalota e 51 i le mae’a o lena faigā filifiliga aoao a Samoa, na faatumau ai le avea o le tofi faipule o Vaisigano 2 ma sui faipule tuto’atasi o le Palemene.
Peita’i ua momoli le sui faipule o lea itumalo i le vaega faaupufai o le Faatuatua i le Atua Samoa ua Tasi e pei ona iai se feiloa’iga a le itumalo ma le ta’ita’i ma sui faipule o le faafaletui o lea pati faaupufai i le Aso Toonai ua mavae.
Ua manino ai le solia o le aiaiga 140 o le tulafono o faigāpalota i le lē mafai ona toe avea se sui faipule o se isi pati poo se faipule tuto’atasi ma sui lagolago o se isi vaega faaupufai pe a mae’a ona faatauto sui mamalu o itumalo i le Palemene.
Ua laumanu’ia ai nei le soloia o le nofoa o Vaisigano 2 ae toe fai lana filifiliga i se palota laitiiti.
O le Aso Lua o le vaiaso nei e toe tauaofia ai le fono aoao faitulafono mo ana fonotaga faaauau ma ua iai le talitonuga o le a aumai ai se finagalo o le Fofoga Fetalai e faamanino ai lea tulaga.
