O le laumanu’ia i faasalalauga i luga o upega tafailagi ma fesootaiga televavave faaonapo nei aemaise o lipoti, o le iai o ni tagata faigaluega faavaitaimi mai Samoa i totonu o Ausetalia, ua le mafai ona toe foi i lo tatou atunuu ona ua le toe faafoiina atu tusifolau ma tuuaia ai le sooupu mo ia galuega, ua aumai ai i se tulaga faalauaitele se faamatalaga mai le Matagaluega o Leipa, Pisinisi ma Alamanuia o loo vaaia galuega faavaitaimi.
Ua faailoa i lea pepa o faamatalaga, o loo silafia e sui o le Malo o Samoa i ona ofisa i Ausetalia ma le sooupu mo ia galuega le Tulafono o pepa malaga ma tusifolau, e le mafai ona umia ma ave e isi le tusifolau o se isi tagata auā e le o sana meatotino.
Ua fautuaina ai tagata faigaluega faavaitaimi uma o aafia i se faafitauli tau tusifolau mo le toe foi mai i Samoa, ina ia faafesootai le ofisa o le Konesula o Samoa i le aai o Sini Ausetalia.
Ua faailoa e le matagaluega e iai nisi o le aufaigaluega faavaitaimi, ua mafua ona aafia i ni tulaga faigata o le toe foi i lo tatou atunuu, ona ua silia aso e nonofo ai i lea atunuu e mafua ina ua agai ma nonofo i ni o latou tauaiga, ma ova ai ma aso ma solia ai aiaiga o visa sa malaga atu ai mo ia galuega.
O nisi foi na mafua ona feagai ma ni faaletonu faapea ona ua sosola ese ma nofoaga sa faamautu ai.
Ua faaalia e le matagaluega o leipa alamanuia ma pisinisi, o lona tiute tauave o loo faamuamua, o le soifua lelei, o le saogalemu ma le puipuigamalu o o tatou tagata o loo tuua le atunuu ona o galuega faavaitaimi.
