Lipotia ua lauina iuga o se tagata faipisinisi mai Whanganui ma le toalua o ana tagata faigaluega i le mae’a faailoa e leoleo sa aofia i latou ia i se li’o o le vaega ua o latou faia tusifolau sese e aofia ai ma ID mo Malo Aufaaasi ma faatau solo i le lalolagi.
O luma o le faamasinoga faaitumalo i Whanganui ua lauina ai le iuga o i latou ia ae o le faamatalaga e faapea o le pisinisi e faia online poo luga o upega tafailagi, e oka ai le tusifolau mo se faataitaiga mai soo se vaega o le laloalgi e aofia ai Amerika, UK, Kanata, Iapani ma Ausetalia e pei ona faamaonia e le vaega a le Tiute/Customs.
O se vaega la o le auaunaga lea o le sapalaia lea o ia tusifolau sese poo ni laisene avetaavale ma nisi ID tau le malo ma o le faatonu o le pisinisi lea o le Magnoli Props, le alii e suafa ia Anthony Magnoli ua faasala e tolu masina o faasalaga i le komiuniti ma le totogiina o se sala tupe e 10 afe.
O ana tagata faigaluega e toalua o loo aofia ai foi, o le isi e 38 tausaga ua faasala i le lua masina o faasalaga i le komiuniti ma totogi foi le sala e 10 afe peitai o le isi e 22 tausaga e lei iai se faasalaga ona e lei tele sana gaioiga na faatino i le soligatulafono.
