Ua tatau ona nofo sauni o Niu Sila i le faamai e aafia ai manu felelei le bird flu lea ua maua mai le faamaoniga mai Ausetalia, ua iai se tagata ua aafia ai.

O se fautuaga lea mai iā i latou e telē le silafia i tulaga tau le soifua maloloina ua ta’ua ai o le bird flu ma le strain lea e faaigoa H5N1. Ua silia ma le 2 tausaga o pepesi le bird flu ae o lea la ua vaaia ua amata ona aafia ai tagata soifua, aemaise foi o manupapalagi i totonu o Amerika.

O faamatalaga mai upega tafailagi a le Faalapotpotoga o le Soifua Maloloina o le Lalolagi, le WHO, e ono amata ane ai foi se isi ituaiga faama’i e pepesi i le lalolagi, pandemic aemaise pe afai e vave pepesi mai le isi tagata i le isi.

Ua faailoa i ripoti o loo galulue nei ofisa o le soifua maloloina i Niu Sila faapea nisi Matagaluega o le Malo ma faalapotopotoga mai tagatanuu lautele, ia mautinoa ia vave ona faamuta le pepesi o lea ituaiga siama ma ia maua se tali sa’o e fo’ia ai lea ituaiga siama.

Puna o Faamatalaga: https://www.rnz.co.nz/news/national/517678/nz-must-be-prepared-for-bird-flu-experts-say-as-australia-confirms-first-human-case