E 37 tausaga o se taulealea o lona suafa o Toese Tu’uaga poo Ese Tu’uaga o le nuu o Vaimoso o loo sailia e leoleo, ona o se gaioiga solitulafono sa faapāpā ai se laau malosi i se vaega o le nuu o Vailoa Faleata i le vaiaso ua mavae.
Ua faailoa e le Komesina o leoleo i se lipoti i le amataga o le vaiaso, o lea taulealea ua maua i sailiiliga sa tuli sona faasalaga i se atunuu i fafo ma sa tipoti ese ai ma toe aumai i Samoa.
O loo talosagaina e leoleo se fesoasoani mai le atunuu i ni faamatalaga e tau saili ai lea taulealea, o loo masalomia foi i nisi o mataupu tau solitulafono o loo suesueina e leoleo, e aofia ai le gaioiga i ni vaiaso e lei mamao atu na faapā atu ai se laau malosi mai se taavale ma aafia ai se alii talavou i Sinamoga.
O le lapataiga a leoleo i le atunuu ia faaeteete pe a vaaia lea tagata ona o loo iai le talitonuga o loo ia umia se aupega o se laau malosi.
