O le faai’uga o le vaiaso ua mavae atu nei na toe faaolatia ai i fanua le lātō i le ea ma le opea i le ala o le ta’ita’i o le malo le afioga i le Palemia ma lana aumalaga sa auai i le faalauiloaina aloa’ia o le laina o fesoota’iga o le Le Vasa Submarine cable a le malo o Amerika Samoa.
O se valaau faaaloalo mai le Kovana Sili ma le faigāmalo a Tutuila ma Manua na malaga ai le Palemia susuga Laaulialemalietoa Leuatea Polataivao Fosi ma lana aumalaga.
Sa aofia ai le Minisita o Fesoota’iga ma Faamatalaga Faatekonolosi, o le Ofisa Sili o lea matāgaluega, o le Ofisa Sili o le Matāgaluega le Palemia ma le Kapeneta, ma le Sui Komesina o le Matāgaluega o Leoleo, Falepuipui ma le Toefuata’ina.
Ua faailoa i lipoti mai le ofisa sooupu o le tatou malo, o se avanoa tāua le auai o le ta’ita’i o le malo o Samoa i le faalauiloaina o lea laina o fesoota’iga o le a mafai ai ona maua e Samoa se isi avanoa e maua ai fesoota’iga televavave mai lea laina e taoto i lalo o le sami.
