O loo tonu lava i le vaai a le kulupu o tagata Kiwi o loo tutū mo Palesitina valivaliga ua vali ai luma o le ofisa o le Amepasa a Amerika faapea le ofisa o le matagaluega o le va i fafo i Aukilani i vali lanu mūmū, faatasi ma faaupuga ua tatau ona faamuta pomu o loo tigaina ai Palesitina.
Mai lea kulupu o le uiga o le valu lanu mūmū o loo ta’u mai ai le toto maligi o tagata ua fasiotia e Isaraelu i totonu o le 38 aso talu le taua o loo faia pea nei, atoa ai ma isi tausaga ua tea.
Saunoa John Minto o le faatonu o le Palestine Solidarity Network Aotearoa, o se auala lelei lava lea e faaleo mai ai o latou manatu.
Peitai, mai nisi o tagata Aukilani ma i latou o loo tutū mo Isaraelu, o le ma’imauga o le taimi ma ua ova le sese auā e leai ma se suiga lelei e maua ai, pau le mea afai ua fia fesoasoani i tagata pagatia o Gaza, ia agai i Gaza.
Ua maua ai foi i finagalo o tagata o loo tutū mo Gaza, e lē o fiafia i le faigamalo a Niu Sila ona e lē o malosi lana finau ua tatau ona faamuta le taua.
O tusitusiga nei ua ave ai e leoleo ma molia le tagata e toatasi i le faaleagaina o meatotino i nofoaga faitele.
