E muamua ona faatulou i lau faafofogaaga Samoa.
A o lenei faasalalauga tāua e tatalo atu ai ma le faaaloalo tele i lau lagolago Samoa mo le pili taufaaofi a le faipule ia Teanau Tuiono o loo i luma nei o le Palemene a Niu Sila, le Restoring Citizenship Removed By Citizenship (Western Samoa) Act 1982 Bill. O lenei tulafono taufaaofi o loo finauina ai le toe faafoi mai o sitiseni Niu Sila o tagata Samoa sa aveese faafuasei e le Malo o Niu Sila i lana tulafono i 1982.
O le vaiaso mulimuli lenei e mafai ona tuuina atu ai finagalo faaalia o soo se tagatanuu o Samoa e lagolago ai lenei mataupu. O lumāmaota o le Fale o Samoa i Mangere i le ofisa o le Konesula o loo mafai ona afifio mai ma tala mai aao e faatumu ai sau pepa o finagalo tusitusia (written submission) mai le 10am – 12pm i le Aso Gafua i le Aso Tofi o le vaiaso nei.
E faapena foi ona tatalo atu i Ekalesia, Mafutaga ma Samoa potopoto ua mae’a ona faatumu a outou pepa o finagalo tusia (written submissions)… faamolemole e tauaao mai a outou pepa i le laulau o loo i lumāmaota o le Fale o Samoa i Mangere i le ofisa o le Konesula mai le 10am – 12pm i le Aso Gafua i le Aso Tofi. E tāua tele le oo mai o a tatou pepa ua mae’a ona faatumu mo le faaooina atu i le Palemene a o lei tapunia finagalo faaalia i le Aso Faraile nei.
Samoa ua leai se taimi, ne’i o tatou misia lenei avanoa e manuia ai nai o tatou tuaa ma aiga o loo i Samoa. Afifio mai ma tala mai aao e faatumu sau pepa e faaalia ai lau lagolago.
O lenei tapenaga o loo tuufaatasia e le Pacific Leadership Forum, Fono Faufautua a Samoa, lagolago a le Mafutaga Soofaatasi a Faifeau Samoa i Aukilani auā Samoa potopoto.
