Ua lagolagoina nei e se tasi sa taalo muamua i le Blues se taumafaiga fou ua faia agai i le rheumatic heart disease, fai mai o se gasegase na aafia ai ae faatoa 13 ona tausaga.
O le alii e suafa ia Matt Johnson ua ia lagolago i le faamoemoe lea o le faia o se polokalame e screen pe sailia ai i latou o loo soifua ma aafiaga o le gasegase lea e aafia ai le fatu.
O se suesuega na faalauiloa lona iuga i le amataga o le vaiaso ma ua ta’ua ai e oo atu i le 1 mai le 50 o tagata Pasefika e aumau i Aukilani i Saute e ono aafia i lenei faamai.
Saunoa le sui o le Te Whatu Ora mai Counties Manukau i le lipoti a le Televise a Niu Sila e faapea o le faia o lea screening o le auala lea e iloa ai poo ai o aafia ma faia iai togafitiga.
O le alii taalo o Matt Johnson na tuputupu a’e i Manurewa ma e ui i faaletonu tau le soifua maloloina sa feagai ma ia a o talavou ae sa oo lava ina taalo i le Melbourne Storm ma le ‘au malosi a le Auckland Blues, peitai o aafiaga o le rheumatic heart disease na iu ina aafia ai i le 2020 ma litaea ai mai le taaloga.
O loo avea nei Matt ma faiaoga i le St Peters College ma ua ia faailoa i le lipoti lea na te lagolagoina soo se gaioiga e faia ina ia iloa ai ē o aafia ma faia vave iai se fesoasoani.
Fai mai o le rheumatic heart disease ma le rheumatic fever poo le fiva rumatika e mafua mai i ni faaletonu e afua mai i le faa’ī, ma a lē togafitia e ono oo ai i aafiaga i le fatu, sooga o le tino atoa ma le fai’ai.
