O le faalauiloa ai i le tausaga ua mavae o le ta’iala e tetee atu ai i gaioiga pi’opi’o ma faiga faaālatua i totonu o auaunaga a le malo, ua lagolago ai le faalapotopotoga o atina’e a malo aufaatasi le UNDP, i se tasi o a’oa’oga mo le faaaupegaina o tagata faigaluega a lo tatou malo i tomai, e taofia ai ia faiga e lepeti ai ta’iala o pulega lelei, ma le mau tali atu i le tula’i mai o ni faafitauli e aafia ai faiga faaālatua poo le corruption.
O lea a’oa’oga sa lagolagoina e le malo o Peletania i le faanaunauta’iga e a’oa’oina faiga e mafai ai ona su’esu’e ni gaioiga faapea ina ia taofia le tula’i mai.
O le ta’iala a Samoa e tetee atu gaioiga pi’opi’o ma faiga faaālatua o se lagolago malosi lea i le feagaiga faavaomalo a Malo Aufaatasi e tafiesea ai ia faiga lē lelei.
O se faailoga foi lea o le naunau o le malo o Samoa e faaleleia ta’iala o pulega lelei o se tasi o manulauti tāua o pulegamalo faatemokarasi.
