Ua ave le lagolago a le malo o Samoa i le tuuina atu o le Pule o le faalaotopotoga o le Nuanua o le Alofa le tama’ita’i o Mataafa Faatino Utumapu e po, e faia iai le filifiliga o ni sui mo le komiti a Aalo Aufaatasi e feagai ma le māta’itūina o aiā tatau o tagata e iai aafiaga tumau.
Ua faailoa ai e lea faalapotopotoga le faafetai i le malo ona o se tulaga lea ua ausia ai se isi laasaga maualuga i le lotolotoi o Samoa i taumafaiga uma e faatāua ai aiā tatau o tagata e iai aafiaga tumau o le tino ma le mafaufau.
O le tama’ita’i pule o le Nuanua o le Alofa e po lana vaai ae o loo avea ma sui o le saofa’iga a malo o le Pasefika mo tagata e iai aafiaga tumau ma e telē lona sao i le tapenaina ma le atina’eina o le fola e taula’i iai fuafuaga uma mo le siitia o le tulaga tau i a’oa’oga ma le puipuiga o tagata e iai aafiaga tumau i Samoa.
Ua faaalia e le tama’ita’i o Mataafa Faatino Utumapu i se pepa o faamatalaga mai le Nuanua o le Alofa, afai e filifilia lona tagata e avea ma sui o le komiti a Malo Aufaatasi e māta’itūina aiā tatau o tagata e iai aafiaga tumau, o le a tuuina atoa lona tagata e auauna ma tautua ai mo Samoa i lea itutino tāua o loo feagai ma galuega e una’ia malosi ai le faatāua o aiā tatau o tagata e iai o latou aafiaga tumau.
