Ua manino le mata o le vai i le mataupu sa soalaupule ai i le faamasinoga, moliaga o faipule na faamavae mai le vaega e puipuia aiātatau a tagata, ua o latou talia aiaiga o le tulafono o palota ma teuteuga o le faavae, ma ua avanoa o latou nofoa i le Palemene.
O lona uiga o le a foi e fesili i o latou itumalo i le toe faia o palota laiti.
O le taunuuga o le soalaupulega i le va o loia, o le faamasino ma i latou e toatolu sa tauaveina tofi faipule o Vaa o Fonoti, Siumu ma Faleata 4 ua lē faaauauina ai le suesueina o moliaga na faia e le Fofoga Fetalai, ae ua faatino le malosi o le tulafono o faigapalota ma le faavae, o le toe foi lea e fai palota laiti ona ua faamavae le tofa Ale Vena Ale, Tu’uu Anasii Leota ma Mau’u Siaosi Puepuemai mai le pati faaupufai sa lesitala ma lagolago iai i le palota tele o le masina o Aperila o le tausaga e 2021.
O le talia e i latou o le toe foi e fai palota laiti na faaalia e le tofa Tu’uu Anasii Leota, sa naunau lava lona sui e faaauau le faamasinoga ona ua afaina o latou aiātatau i le avea ma sui faipule tutoatasi ae lē o le lagolago i se isi vaega faaupufai.
O lea ua faailoa e le tofa Ale Vena o le a tauva i le palota laititi a lona itumalo o Faleata 4 mo le vaega o le Faatuatua i le Atua Samoa ua Tasi, peitai o Tu’uu Anasii ma Mau’u Siaosi e lei mautu so la finagalo ona e toe fia fesili i o la itumalo.
O le a tatou tālia se aso o le a faailoa lautele mai ai e le Fofoga Fetalai ma le ofisa o le komisi o faigapalota aso o le a tapena ai itumalo o Vaa o Fonoti, Siumu ma Faleata 4 mo a latou palota laiti.
