A itiiti mai pe to’a 17 pasese na faamanu’alia i le vaalele na lavea i le malaevaalele i Kanata e pei ona faailoa mai e le faauluuluga o lea malaevaalele i lipoti a le CNN.
O le vaalele a le Delta Air Lines e 80 le pasese sa iai i luga mai Minneapolis na uma ane ua u sese, upside down ina ua tulaueleele ae e le’i iai se soifua na ma’umau ai.
Ua faailoa e le pulega a le malaevaalele lea e lua runways o le a tapunia pea mo le taimi nei a o faia le su’esu’ega i le mafua’aga o le lavea o le vaalele.
E faafetaia ai e le pulega le vave o gaioi a le aufaigaluega i totonu o le malaevaalele ma le tali atu i lea faaletonu semanū e tele ni soifua e aafia ai.
Na molimau nisi o pasese i le aufaasalalau e tu ane le vaalele ua tautau mai le pasese e pei ni pe’a se’i tulou, ona o le tulaga na oo iai le vaalele ae faafetaia foi le vave o le gaioi a le aufaigaluega i le malaevaalele i le aveesea uma mai o le pasese ma o loo saogalemu uma.
O loo faaauau le su’esu’ega i lenei faalavelave.
Puna o Faamatalaga: https://edition.cnn.com/world
