Ua faailoa e le alii Komesina o Leoleo ia Auapaau Logoitino Filipo ua ioeina e leoleo e toafā na faamalolo i le tolu vaiaso talu ai ae faagasolo suesuega a le Matagaluega o latou sootaga i ē na molia atu ona o fualaau faasāina.
Ua faamanino mai foi o la latou suesuega na faia ua maua ai le sootaga o ia leoleo i tagata o loo masalomia i fualaau faasāina, peitai e lei maua o faaaogāina fualaau faasāina.
Ua toe foi atu nei i latou na faamalolo lē tumau ia latou galuega peitai ua lē o toe tuuina i latou i le ofisa suesue le CID ae ua tuuina atu i nisi ofisa i totonu o le Matagaluega o Leoleo e galulue ai.
Mo le silafia e toatolu alii, toatasi le tamaitai leoleo na faamalolo i le amataga o le tausaga.
O se tulaga o loo teena malosi ma lē taliaina e le pulega o le Matagaluega o Leoleo e pei ona faaalia foi e le tamaitai sui Komesina ia Papalii Monalisa Keti ia tatou tala i le uluai tulai mai ai o lenei mataupu, e lē taliaina e le Matagaluega ia ituaiga amioga, ma ua tilotilo foi i le mafai ona faia o ni suesuega (drug tests) i leoleo uma o le Matagaluega.
E lē faatoa tupu ai lea o lenei faafitauli i le Matagaluega e pei foi ona tuuaia ai le silia i le 20 leoleo i tausaga ua mavae ona o le sootaga lava lenei i fualaau faasāina.
O nisi o i latou na masalomia i ia taimi na faamavae ma le Matagaluega.
