Ua ioe le European Council e sainia le maliega o fefaatauaiga saoloto ma Niu Sila, peitai e iai le isi laasaga tele e tatau ona pasia muamua.

O le faaiuga a le European Council ua iai nei e ono sainia ai lenei maliega i le masina fou pe a malaga le Palemia ia Chris Hipkins i Europa.

Peitai e ui o se tala fiafia mo fefaatauaiga a Niu Sila e le mafai ona aloaia seiloga e pasia e le Palemene a Europa faapea ai foi ma le pasia e Niu Sila o le tulafono.

Ua fai mai ai ma nisi o le a faamoemoe uma lava i le malosi o finauga faapolokiki.

E le o fiafia le aufaifaatoaga i Europa i le maliega lenei, ma ua fesiligia ai foi e le komiti o le Palemene a Europa le penefiti o le aufaifaatoaga i le maketi i Europa pe a taunuu.

Ae mo Niu Sila afai ae taunuu o le a lē toe totogia ai tiute o oloa o loo faatau atu i Europa lea e faatusaina pe ā ma le 97% oloa o le a lē toe iai ni tiute.