Ua mae’a nei le faatalatalanoaga e iloiloina ai le tulafono mo vailaau o loo faaaogāina e faatama’ia ai manu faalafuā o loo aafia ai laau ma manu.
O lenei faamoemoe sa taimua ai le Matagaluega o Faatoaga ma Faigafaiva faatasi ai ma le Faalapotopotoga o Taumafa i le Lalolagi a Malo Aufaatasi.
O le faatautaia ai o lenei faatalanoaga o loo i lalo o le poloketi i le Pasefika o loo faasopolia ai nisi o atunuu e aofia ai Samoa, Atu Kuki, Fiti, Kiribati, Atu Solomona ma Vanuatu.
O loo agai lenei faatalatalanoaga sa auai ai paaga e silasila i nisi o vaega o loo iai nisi o vailaau matautia ma faailoa ai nisi o faamaumauga.
Ae o le autu lava sa agai lea i mataupu o loo aafia ai le faatinoga o vaega faaletulafono o le tulafono o vailaau faasāina 2011.
E ui ina tele taumafaiga a le Malo ina ia siitia le tulaga i puipuiga i vaega tau faatoaga ae peitai o faatinoga ia tafiesea manu faalafuā o loo avea pea ma faafitauli.
I se suesuega a le Ofisa o Suesuega Faasaienisi a Samoa i lenei tausaga o loo atagia ai le aafia ai o le tulaga i le soifua maloloina o tagata i le faaaogāina faasolitulafono vailaau e ala lea i le lē teuina lelei pe a mae’a faaaogāina.
O lenei fesoasoani e agai lea i le siitia o le puipuiga o mea taumafa i le Pasefika ma ia ogatasi ma fautuaga i le lipoti faaletulafono a le atunuu i vailaau.
