O le taeao nei sa faatautaia ai se sauniga e faatautoina ai le Taitaifono o le Komiti Faufautua mo Totogi ma Faauluuluga o Matagaluega ma Faalapotopotoga a le Malo.
I le saunoaga a le Palemia, Afioga Fiame Naomi Mataafa na faafetaia ai le naunautaiga o i latou ua umia tofiga nei e tautua ai i le atunuu.
“Ou te talitonu ua tele lo outou silafia i galuega faale-Malo i ofisa ma matata o loo outou faafoe ma galulue punouai ai.
“Ua maua foi lo outou tomai masani ma le to’a e faatino ai tiute uma e tusa ma ala o le tulafono o faiga faavae a le tatou Malo.
“O le faamanatu ia tautuana la outou auaunaga ma le tautua mo le atunuu, ia malu, ia mapo, o le tatou anava lena ia tatou faiva e mamanu faatasi ina ia manuia Samoa ma ona tagata.”
Faailoa e Fiame le maualuga ia te ia ma le Kapeneta o le sao o tofiga nei i le fautua i faiga faavae aemaise le faatinoina o galuega a le tatou Malo.
“O le tuualalo aua le tuua le fautua ma le unaia o faatinoga uma ua faatulaga mo le manuia lautele o le atunuu.
“Ia maelega foi la outou silasila i auala uma e matimati ai a tatou galuega aemaise le faafoeina lelei o le aufaigaluega e ala i pulega lelei.
“E faapea foi le tausia ma le unaia o le tautua matavela ma ia tausaafia.”
A o iai le lalolagi i vaitau o suiga maaleale o le tau, o fetauaiga aemaise o tulaga i tamaoaiga na ia faapupula ai, “mo se atunuu laitiiti e pei o Samoa e faatāua le fuafuaina lelei o le tamaoaiga e aputiputi nai a tatou alamanuia ma ia soifua e tusa ma le foai a le Atua ua tatou maua.”
O lana faamalosiau mo i latou ua faatautoina, “Ia manatua e iai aso e lagilelei ai e iai foi aso ua louloua ai, o ituaso maaleale ia o galuega faa-Taitai.
“Ia faalototeleina outou ma faamoemoe i le Atua ona manuia lea o outou faiva auā le auaunaga mo Samoa.”
O Faauluuluga / Ofisa Sili nei o Matagaluega na faatautoina:
Matagaluega o Aoga ma Aganuu – Aeau Chris Hazelman
Nofoaga o Suesuega Faa-Saienisi – Fiso Dr. Fiame Leo
Matagaluega o Tiute ma Tupe Maua – Fonoti Talaitupu Li’a Taefu
Ofisa Sili/Failautusi o le Komisi o Galuega a le Malo – Kolone Tikeri
Faalapotopotoga o Faaputugatupe o le Lumanai Manuia o Tagata Samoa (S.N.P.F.) – Lemalu Selesitina Puleaga Meni-Reti
Faletupe o Atinae o Samoa – Mua’autau Raiē Silipa
Faalapotopotoga o Fale (Housing Corporation) – Sautiamaivasa Titimaea Tiotio
Kamupani Vaa a Samoa – Tafesilafai Ipiniu Filipo
Komesina o le Ofisa o le Komisi o Faigapalota – Tuiafelolo Alexander John Stanley
Ofisa o Tausi Mavaega (Public Trust) – Tuitoga Christina Angela Te’o Faitele
Pule Sili o le Iunivesite Aoao o Samoa – Tuifuisaa Patila Amosa.
