O se alii foma’i i Hawaii ua molia i le taupulepule e fasioti lona to’alua ina ua feta’ua’ina lona osofa’ia o lona to’alua a o alu se la savaliga i Oahu, fai mai e mafua ona o le musu o le fafine e pu’e se la selfie.
Ua lipotia i le 9News o le foma’i o Gerhardt Konig, 46 tausaga le matua, o loo taofia nei i le Oahu Community Correctional Centre ma ua faailoa i se pepa o faamatalaga mai le ofisa o le loia i Honolulu, ua faatulaga e $5 miliona Amerika e totogi e mafai ai ona tatala i tua.
O le faamatalaga a le to’alua o le foma’i i leoleo e faapea na alu sa la savaliga ma lona to’alua i le auala savali i le faaitu sa iai o Oahu, ma i le taimi lea sa tu faasiusiu ai lona to’alua i le vaega na o la savalia na fai ane ai ia te ia e pu’e se la selfie.
Fai mai le tinā lea sa lē nofo lelei ia te ia lea faamatalaga ona nofoaga sa mana’o lona to’alua e pu’e ai le ata, ma ia toe savali ese mai ai.
Peitai fai mai le tamaitai i lana faamatalaga tusitusia o i na amata ai ona e’e ane lona to’alua ia te ia ma i’u ina una’i ai o ia i le togavao lata ane ma ia faaaogā ai loa se maa e togi ai lona ulu ma faaoolima ai ia te ia.
Mulimuli ane faasaoina mai le tamaitai na aafia e nisi sa uia lea auala ma ave atu ai i le falema’i, o loo iai i se tulaga tigāina.
Ua faia nei moliaga i lea alii foma’i, ma o loo faatalia le taimi e fofoga ai le mataupu i le faamasinoga ma su’esu’ega o loo faagasolo.