A itiiti mai pe to’aono pepe ua maliliu i totonu o le lua vaiaso i Gaza ona o le lē lelei o tulaga o loo tausia ai e pei ona faailoa mai i faamatalaga a sui mai le soifua mālōlōina.

O foma’i i le falema’i lea o le Patients Friends Benevolent Society na o latou faailoa e to’a 9 pepe na ola ane i le falema’i lea ae iai tulaga na aafia ai ma taofia i le falema’i, to’alima na ma’umau ola ma le isi sa matua’i tigaina.

Fai mai le mau a nisi o aiga ua mafua ona ma’umau ola o nai pepe ona o le mālūlū.

Ua ta’ua i lipoti a le BBC le valaau foi o le falema’i lea mo le tuu ane o ni caravans e mafai ona fesoasoani i le silia ma le 945 afe o tagata Palesitina o loo nonofo i fale’ie ma fale lē tumau.

O le mataupu lea o loo tuua’ia ai pea e le Hamas Isaraelu ona o le lē faataga ane o le tuuina atu o fale’ie ma fale e fesoasoani i tagata Palesitina o loo moomia lea lavea’i.

O le to’atele o le faitau aofa’i o tagata Gaza pe ā ma le 2.1 miliona o loo nofonofo solo e lē o mautū nofoaga e aumau ai talu ona to’a fetauiga i Gaza, ma o isi aafiaga ia o le tulaga o iai o le ma’umau o ola o nai fanau ona o le lē lelei o mea o loo tausia ai.

Puna o Faamatalaga: https://www.bbc.com/news/articles/c62k676gk34o