Ua iai nei se vaega o uafu i Mulifanua ma Salelologa ua puipuia lelei e paka pe tutū ai taavale ae totogi.

E faapitoa lea auaunaga ia i latou e malaga i Savaii poo Upolu ae fia tuu lana taavale i ia nofoaga mo le po atoa, se’i toe taliu le malaga ona faato’ā aveese lea o lana taavale.

O se auaunaga fou ua ofoina e le pulega o uafu ma taulaga i le na o le $10 tala le totogi, ae o isi vaega o le uafu e lē o aofia i lea totogi, o lona uiga e paka pe tu ai le taavale ae lē totogia.

Ua faailoa e le pulega o uafu ma taulaga lea auaunaga fou a o lata ai ina ma’ea nisi o galuega faaleleia i luga o ia uafu o loo faaaogā i aso uma e le atunuu mo malaga i le va o motu, e pei o se faitoto’a ua fausia i le nofoaga e ulufale ai i le uafu i Mulifanua.

Faaalia e le pulega o uafu ma taulaga o loo iai ma se vaega ua fausia e tapuni ma tatala ai le ulufale ma le ulufafo o taavale mai le lotoā o le uafu, o se faiga e faatonutonu ai taavale i taimi o le mānava o galuega.

Ua faia foi galuega e le pulega mo le faaleleia o faleui o loo faaaogā e le atunuu femalagaa’i i le va o motu, o se isi lea o vaega tāua mo le tausia o le soifua mālōlōina.

Ua lata ina mae’a ia galuega, ae o se tasi lea o taumafaiga a le pulega o uafu ma taulaga ua tuu iai le vaaia ma le pulea o uafu uma i le atunuu.

O Oketopa o le tausaga e 2022 na faia ai le faai’uga a le malo e tuu i lea pulega le vaaia o a tatou uafu.