O le Aso Faraile nei e pei ona faailoa e le Minisita o Tupe o loo aofia ai ma le faalapotopotoga o le faaputugatupe o le lumana’i manuia o tagata le N.P.F., o le a fono ai le komiti faatonu o le faalapotopotoga ma faamautū ai se faai’uga i se faamanuiaga e maua e le aufaisaofaga.
Talu ona toe a’e galuega uma a le malo mo lenei tausaga fou, o le pese leotele lea mai nisi o le aufaisaofaga poo le ā le taimi e faailoa ai e le N.P.F. se pasene o se meaalofa poo se tufatufaga o se faamanuiaga le dividend.
Sa faailoa e le tama’ita’i Minisita o Tupe le afioga Mulipola Anarosa Ale Molioo, o le fono a le komiti faatonu i le faai’uga o le vaiaso nei e iloa ai se faamanuiaga ina ua fesiligia i le mae’a o le sauniga lotu masani a le faamasinoga e talosia ai galuega o le tausaga, lea sa auai le Minisita i lona tulaga o le tasi o Sui Palemia.
