O le asō e faapea e taunuu mai ai i Niu Sila le tamaitai Peretania ia Kellie-Jay Keen poo Posie Parker.
O se tasi ua lauiloa i ana saunoaga faalauaitele ma faalauiloa e tu malosi ai mo aiātatau a tamaitai ae teena faafafine.
O le malaga mai ai o Posie Parker e sau e lauga i Aukilani ma Ueligitone i le faaiuga o le vaiaso a o iai i lana malaga taamilo o le Let Women Speak.
Ae e lei oo mai i le taeao nei, o le Aso Lulu na fai mai ai le Immigration ua talia le ulufale mai o Posie Parker i totonu o Niu Sila ma o ananafi lea na faaulu ai loa le talosaga a nisi o faalapotopotoga o loo tutu malosi mo aiātatau a tagata e faatalosagaina le tulafono e vaoia ai le mafai ona ulufale mai seia uma le iloiloga.
O faalapotopotoga nei e talitonu e ono save’u ai le filemu o le komiuniti e pei ona molimauina foi i polokalame a Posie Parker a o iai i Ausetalia i le vaiaso talu ai.
A o tālia ai e le Immigration le malaga mai o Posie Parker, e le o se tagata e manao iai le minisita o le Immigration Michael Wood e sau ma e faapea manatu o sui o le Greens.
E oo mai i le taeao nei e le o iai se isi tala e toe suia ai le faaiuga a le Immigration e faailoga fesili ai le sau o Posie Parker.
Ae o le lu’i a Posie Parker ua fai mai i Ie Palemia o Niu Sila, Chris Hipkins, e tofo iai pe a teena lona visa e ulufale mai ai e ui ua fai mai le Palemia e le o sana matafaioi le talia ma le lē talia o visa malaga.
