Ua ta’ua i lipoti i le aso mai le RNZ ua faaata ane e le matagaluega o le soifua maloloina pe ā ma le 134 avanoa faigaluega o le a aveesea ina ia ausia ai le tulaga o loo manaomia atu e le malo ia faaitiitia ai tupe faaalu.
Ua ta’ua foi i le lipoti o loo valaau foi le matagaluega o le Social Development i le aufaigaluega o i latou e fia aofia i le vāea o le a faia a le auaunaga.
Ua ta’ua o loo faia fonotaga a le matagaluega o le soifua maloloina e faatalanoa ai lea fuafuaga ma o finagalo faaalia o le a faamuta le taliaina i le aso 26 o le masina nei ma faia ai loa se faaiuga mautu i lea mataupu i le masina o Iuni.
Ua ta’ua ai ma se faamatalaga mai le Public Service Association o tulaga ia o le ofo atu o le tagata e alu ai i le au vāea, voluntary redundancies atoa ai ma isi avanoa faigaluega e lē o tuuina iai ni tagata, e ono vaaia ai le faitau selau o tagata faigaluega e agai ese ma o le faiga a le malo ua faatino nei o se tulaga faamāina i le faaitiitia lea o avanoa faigaluega o loo tausia ai le toatele o tagata o le atunuu.
Ua faailoa i le lipoti lava lea a le RNZ o isi matagaluega e pei o le faasao, Department of Conservation ma mataupu faalotoifale, Internal Affairs o le a folasia a la fuafuaga mo le faatinoina o lea tulaga i le faaitiitia o tupe alu, sosoo atu ai ma le Oranga Tamariki i le isi vaiaso i luma atu.
