O le a tele atu avanoa ma aiātatau faalegaluega a tamaiti aoga faavaomalo e faigaluega ai i le atunuu pe afai ae tulai mai le National i le palota i le masina fou, o le folafolaga lea a lea vaega faaupufai ua faalauiloa i le vaiaso nei.

Saunoa ai le taitai o le pati o le fuafuaga a le National ia toe faaolaola le aofai o tamaiti aoga mai fafo i totonu o Niu Sila, lea fai mai le latou sooupu o Penny Simmonds o loo feagai lava le vaega lea o tamaiti aoga faavaomalo ma faafaigata talu ona mae’a mai le koviti. 

I le taimi a o lei oo mai le koviti o tamaiti aoga mai fafo poo tamaiti aoga faavaomalo o le lona lima lea o alatupe maua aupito maualuga a Niu Sila ma maua ai foi avanoa faigaluega.

Peitai o le taimi nei ua feagai ma faigata ma ua alagatatau ai ona faatino lea fuafuaga.

Fai mai le National o le vaega tupe e maua mai pili o tamaiti aoga i aoga maualuluga e mafai ona faaleleia ai tulaga o aoaoga i totonu o Iunivesite ma soo se auaunaga ae o le a maua ai foi se faamāmā avega mo tamaiti aoga i totonu o le atunuu. 

O isi suiga o le a faia e le National i lalo o lea fuafuaga e aofia ai le faavavevave ona faagaioi visa mo tamaiti aoga ia e totogiina se fee faaopoopo, faaopoopo itula e mafai ai ona faigaluega tamaiti aoga faavaomalo i vaiaso taitasi mai le 20-24, aemaise ai le faalautele o aiātatau faalegaluega a tamaiti aoga faavaomalo ma a latou paaga ina ia atili faatosina mai ai i le atunuu.