Ua faalauiloa e le faigamalo ana fuafuaga mo le vaega o felauaiga, transport mo le isi 10 tausaga peitai o ia fuafuaga e foliga ua punitia i le siitia o le tau o le a totogi e avetaavale ina ia faatino ai.
O le Palemia Christopher Luxon ma le minisita o Felauaiga, Simeon Brown na folafolaina se fuafuaga faataitai poo le draft a le malo i ana faiga faavae e faatatau i femalagaa’iga i le laueleele.
Ua folasia mai ai ni auala e 15 e iai lona tāua i le atunuu atoa ma lona faatumauina faapea foi ma tupe o le a faaagaga mo le faaleleia o mea e pei o omoomo o le alatele, ae o le a faaitiitia tupe e faaalu i auaunaga o femalagaa’iga lautele ma auala mo uila ma auala savali.
O se vaega o lea folasaga ua ta’ua ai e le Malo o le a leai se siitaga i le tau o le lafoga totogi mo penisini mo le kuata lenei ae o le a totogi e avetaavale le 12 sene faaopoopo mo le lita o le penisini e amata i le 2027.
Ua faailoa foi o le a siitia lesitala o taavale i le $25 tala e amata i le 2025 ma le isi $25 o le a toe faaopoopo iai i le 2026.
Sa faailoa finagalo o nisi i le mataupu lea ma ta’ua ai o le siitaga la lea i le lesitala ua foliga ua ese mai i folafolaga na faia a le Palemia i le taimi o campaign faapea e leai nisi tax fou o le a faia.
