Na foi i le malae vaalele tele i Faleolo ma tulaueleele ai se tasi o vaalele laitiiti o le Samoa Airways ma lana pasese e 16, ina ua iai se faaletonu na tula’i mai ina ua malaga ese ma le malae vaalele i Fagalii i le faamoemoe mo Amerika Samoa.
O le taeao o le Aso Toonai na te’a nei na tula’i mai ai lea faaletonu ae e lē o faailoaina e le kamupani vaalele i lana pepa o faamatalaga poo le ā le faaletonu na tupu.
E ui i lea tulaga na aafia ai se tasi o vaalele o le Samoa Airways ae sa faaauau malaga i le va o Apia ma Pago Pago na faaaogā ai le tasi o vaalele laitiiti le twinotter.
O le Aso Toonai lava ina ua mae’a ona faaleleia le faaletonu na toe fealua’i ai le vaalele na tula’i mai ai le faaletonu.
O loo i le atunuu o Kanata le isi vaalele laitiiti o le kamupani vaalele a Samoa mo galuega faaleleia i le tino ma afi ma e sefulu miliona o loo faaalu ai e le Samoa Airways.
O le isi vaalele sa auina foi i lea atunuu mo galuega faaleleia ua toe foi mai ma o loo fealua’i mo malaga masani a le Samoa Airways.
E lē o faailoaina mai e le kamupani vaalele poo le vaalele lea na ave mo galuega faaleleia na tula’i mai ai le faaletonu.
